"Comenti fadiat mamma". Nuccia Piccioni contat carant'annus de traditzioni in sa catedrali de su druci de Cuartu Sant'Alèni
(IlMinuto) – Casteddu, 4 de su mes”e cabudanni – Cumbidai unu druci a dógnia persona chi intrat, calisisiat sa persona, poita deu s’apu imparau senz”e si pigai dinai”. De su 1970 in Cuartu Sant’Alèni, in bia Marconi 312, in d’un’ofelleria pitica ma mirifica, is sorris Piccioni, Nuccia e Mariolina, sighint a portai ainnantis is imparamentus e sa filosofia de sa mamma Gesuina.
Atobiaus a Nuccia, in d’unu merici de is últimas diris de su mes”e austu, mentris, cun su devantali biancu, aghillit a is clientis in custu bera e própria catedrali de su druci sardu, afestada puru de su “Gambero Rosso” e de su “Slow Food” e de pagu arribbau puru a Rai Due. ”Eus imparau de mamma nostra, mamma Gesuina, ma no po bendi, eus imparau scéti po praxeri. Furiant àterus tempus, furiaus piticheddas. 41 annnus fait, a pustis de cinc’annus de imparamentu a 68 piciocas in d’unu cursu professionali eus decídiu de s’oberri un’ofelleria”. Nuccia s’oferrit unu guefu e s’intervista cumentzat.
In custus annus eis sighiu is imparamentus de sa mamma de bosàteras o eis fattu calencunu cambiamentu?
A pustis de totu custus annus sigheus a sighiri is imparamentus de mamma. Oi medas ‘druciaius’ medas connotus ant cambiau su métodu. Segundu su chi ndi pentzu deu no andat beni. Est inútili cambiai. Po fai un’esémpiu, po fai is mustatzolus nostrus, tra is drucis prus dimandaus de is clientis nostrus, sigheus a sighiri s’arretzeta chi s’esti stetia imparada, diversa de cussa aristenesa. Una palinedda de framentu. Sa méndula mollia a manu duas bortas. A pustis aciungeus sa vaniglina, sa gannella, s’acuadrenti e su cognac. Própriu comenti fadiat mamma. 13 diris axedendi, puru si fait callenti”.
Genti meda intrat in sa butega de bosàteras no scéti po pigai drucis ma puru po ammirai s’imbirdiera de aparda prena de drucis pintaus comenti prendhas.
“In meda disisterraus benint a fai fotogràfias, movius de su spéddiu po sa Sardigna e po is prodotus traditzionalis suus. Eus cumentzau a fai s’imbierdiera medas annus fait sighendi, puru in custu, is indicus de mamma. S’imbierdiera benit fatta una borta a s’annu, po sa Festa de Sant’Elena, sa Santa protetora de Cuartu, e abarrat serrada po doxi mesis. Aintru poneus totus is tipus de drucis chi scideus fai: is pirichitus, is pàrdulas, is arrosas, is pabassinas… totus. Comenti naràt mamma, ‘dógnia druci est una pregadoria’. In s’inbirdiera s’allogant beni e ocannu funt ancora prus bellus de is àterus annus. Beru?”
Beru diaderus. Funt pomposus. Fadeis scéti drucis de sa traditzioni cuartesa?
“Candu eus cumentzau fadiaus is oreglietas, de sa zona ‘e Núgoro, ma biu ca sa genti furiat scréntili, ca no si crediant capacis a fai arretzetas de àterus logus, mamma at decídiu ca depiaus fai scéti is drucis de Cuartu Sant’Alèni. E aici eus fattu. Funt drucis medas decorativus”.
A segunda de is períodus de s’annu si fait unu tipu de druci. Po sa Festa de is Mortus dd’est unu druci tipicu. Candu sa genti benit a pigai su druci pigat su druci de su períodu o no fait distintzionis?
“Calencunu clienti abarrat acapiau a sa traditzioni e pedit sa pabassina e a su pan”e saba. Cusat est sa traditzioni de is Mortus. Custas arrosas fintas dd’as fadeus po Santu Valentinu e po sa Candelera. In Cuartu dd’as fadeus scéti nos. Perou fadeus totus is drucis po totu s’annu. No depit mancai nudda. Guai si mancat cosa”.
Teneis unu druci po sa coja?
“No, no teneus unu druci specificu, ma is drucis nostrus decoraus cun is nòminis de is isposus funt meda dimandaus. Própriu immoi ant a benni a arretirai 20 safatas, aundi, comenti fadeus de solitu, eus postu unu pagu de totus is specialidadis nostras”.
Progetu fattu cun sa partecipatzioni de sa Regioni Autónoma de sa Sardigna – L.R. 26/9 po sa língua e cultura sarda