Riformas. Paolo Maninchedda (Psd’Az): "Sardigna indipendenti in d'un'annu"

(IlMinuto) – Casteddu, 22 de su mes''e cabudanni - "Su stadu in Sardigna depeus essi nos poita assinuncas su Stadu in Sardigna no at essi mai po nos". Cun custus fueddus su consilleri regionali de su Psd'Az Paolo Maninchedda at concludiu ariseru sa presentada de sa motzioni sardista po s'indipendentzia de sa Sardigna. Su rapresentanti de su Psd'Az - in s'ambitu de su dibbàtidu asuba de sa riforma de su Statutu - at propostu a s'àula s'aprovatzioni de un'odg unitariu po arribbai intru su 12 mesis a sa nàscida de su Stadu sardu.

"Nos dimandaus a su Consillu regionali - at precisau - de s'espressai in d'un'odg, chi iaus a bolli scriri cun bosàterus totus, po s'indipendentzia de sa Sardigna, pensada comenti costrutzioni de su stadu sardu aintru de unu patu federativu cun s'Itàlia".

Una motzioni po otèniri s'indipendentzia e sa soverania de s'Ísula esti stetia preparada puru de sa presidenti de is Rossomori Claudia Zuncheddu.

"60 annus de Àutonomia - at scritu Zuncheddu - no funt arribaus a fai su sinnificau prus importanti, cussu de s'autogovernu e de s'isvilupu economicu, antzis, at ammanniau s'asugetamentu coloniali po mori de su Stadu italianu chi dominat, ferrendi sa boluntadi de su pópulu sardu".

Su dibbàtidu asuba de is riformas sighit oi in Consillu regionali.