Ambienti. Sardigna Natzione narat no a sa nai de is belenus in Pòrtu Turre

(IlMinuto) – Casteddu, 8 de su mes''e ledàminis - "Imbidaus a is citadinus de Pòrtu Turre a acastiai e si mobilitai po impediri su sbarcu de su càrrigu de belenus, e is organizatzionis indipendentistas a fai un'atzioni totus impari contra a cust'àteru atu de malesa a is sardus". Si serrat cun custus fueddus sa nota de imprenta fatta connosci ariseru de su cordinadori provìntziali de Tàtari de Sardigna Natzione Indipendetzia Giovanni Fara. S'organizatzioni indipendentista espressat difatis grandu "apinnicu e arrennegu po sa nova pubblicada de s'Uniona Sarda de custu mangianu (ariseru, ndr); segundu custa nova iat a essi in arribbu in su sbarcu de s'area industriali de Pòrtu Turre una nai mercis chi at a scarrigai tonnelladas de 'fok', un'arrefudu de su traballu de s'acetilene, arrefudu belenosu e chi no si podit riciclai". "Pensaus - pprecisat Fara - ca su Stadu italianu no siat in is cunditzionis políticas e moralis po podi domandai a custu territoriu un'àteru sacrificiu in difesa de interessus chi funt atesu de sa Sardigna e de is bisóngius berus de sa genti sua. Innoi sa produtzioni de su polu industriali at marcau in modu meda malu sa vida fadendi impestaduras e arregallendi cancrus".