Cpa de Su Masu. Loddo (5 novembre): “102 algerinus imbargaus po 40 diris contra a sa lei. Sreaai debressi custa galera

(IlMinuto) – Casteddu, 13 de su mes''e ledàminis - "Arrespetendi a is leis, chi bollint frimmai is furisteris in is Cpa no prus de cincu diris, is 102 algerinus funti stetius 'imbargaus' po prus de 40 diris. In custas cunditzionis piedosas, aundi s'única crupa de custas ànimas algerinas est custa de no essi nàscias in Itàlia, s'arrebbellai est giustu". Est cantu afirmat cun d'una nota Roberto Loddo de s'assótziu 5 novembre.

"Is algerinus - precisat Loddo cummentendi s'acontéssia de martis - ant decidiu de s'arrebbellai a sa violéntzia de is leis ratzistas e xenofobas de su guvernu. Su Cpa de Su Masu, comenti totus is centrus de presonia italianus e europeus, no tenit nudda de s'acasàgiu e de s'ospidàgiu. Bastat donai una castiada a is barandíglias artas tres metrus, a is tressas, a is vantanas, a is telecameras a is rastréglius, a is militaris chi presidiant su Cpa". S'assótziu 5 novembre pedit debressi sa serradura de s'istrutura de Su Masu, lamada "galera po furisteris". "Aintru de custus centrus - acrarat Loddo - is diritus e is arrégulas funt mortas. De fattu est impossíbbili donai una difesa legali comenti si depit e a ddis fai bisitas costantis".