"Indipendence day". Cumpostu (Sni) si ndi stresiat de s'eventu. "Eus dimandau unu rinviu e no s'eis nemmancu arrespustu"

(IlMinuto) – Casteddu, 26 de su mes''e ledàminis - "Indipendence day". Est custu su nòmini de sa "caminada longa indipendentista" chi s'at a tenni su 27 de su mes''e totussantus chi benit in Sardigna. Sa manifestada esti stetia pensada de unu grupu de militantis inidipendentistas senz''e partidu, ambasciadori Filippo Grecu. De s'eventu s'est stresiau Bustianu Cumpostu, cordinadori de Sardigna Natzione Indipendentzia.

"Pigu atu - scririt Cumpostu - chi s'imbidu de Sni, cundividiu de àterus movimentus indipendentistas, de lassai stai a un'àteru tempus s'eventu po podi aici cumentzai unu processu de preparatzioni cundividia, no esti stetiu scéti ignorau ma no esti stetiu nemmancu dignau de un'arrespusta". "In custu contestu - precisat su cordinadori de  Sni - addiriri a s'imbidu de bosàterus iat essi un'ammissioni, comenti movimentu indipendentista, de sa própriu ligeresa e incapacidadi de avaloramentu de su momentu istoricu chi est bivendi sa natzioni sarda".