Istrutzioni: 5,8 millionis de euru a is comunus donaus po pigai líbburus de iscola

(IlMinuto) – Casteddu, 19 de su mes''e ledàminis - 5,8 millionis de eurus po sa furnidura de líbburus de iscola in favori de is istudiantis prus pòberus. Est cantu at donau ariseru una delíbbera aprovada de sa Giunta regionali a pabas de una proposta fatta de s'assessori de sa "Pubblica Istruzione" Sergio Milia. "In su specificu, po s'annu iscolasticu 2010/2011 - si legit in d'una nota de imprenta - ant essi donaus a is comunus casi 3,3 millionis de eurus po sa fornidura a gratis o casi totu a gratis de is líbburus de iscola po is scientis chi faint s'iscola media e po cussus chi faint is iscolas superioris. 2,5 millionis de eurus ant essi donaus in forma de contribbutu a is iscolas superioris de sa Sardigna po sa furnidura de líbburus in comodau a is istudiantis chi tenit pagu dinai". S'Esecutivu regionali at donau puru àterus 5 millionis de eurus, a is Entis de su territoriu, cun s'obbietivu de "promoviri e agiudai s'inclusioni de is istudiantis disàbbilis".