Istrutzioni. In Casteddu in 700 contra a s’”iscola-miséria”. Cumentzat sa campagna Cobas po denunciai “illegalidadi in istitutus”

(IlMinuto) – Casteddu, 15 de su mes''e ledàminis - "Dinai po s'iscola e no po sa guerra". Est custa sa scrita chi si podiat ligi in d'unu striscioni fattu de is istudiantis, chi custu mangianu ant participau a sa manifestada aprontada de is Cobas, in Casteddu, po s'isciòpiru generali de s'iscola. Pagu prus de 700 personis, tra maistuis, scientis e personali ténnicu e amministrativu de s'iscola púbblica, ant nau ancora una borta no a sa riforma Gelmini e a is tàglius de su Guvernu, imbidendi sa genti a pigai parti a su corteu partiu de pratza Garibaldi. Ant dimustrau puru is precarius de s'iscola de su Cumitau de Casteddu e de su Cordinamentu de Aristanis. "Est necessàriu - at nau sa rapresentanti de is Cobas de s'iscola Mariella Setzu - manifestai in d'unu momentu de disisperu. In Sardigna - at acrarau - in tres annus iscolasticus si funt perdius unu totali de 5.738 postus tra maistus e personali Ata. 1.600 postus in su 2008/2009, e scéti 2.319 postus ocannu". In is fattus medas iscolas faint fatiga a andai ainnantis cun s'atividadi normali senz''e fai recursu a is straordinarius e in d'un'Istitutu ténnicu industriali de Tàtari esti stetia formada una classi de 43 scientis.

"In medas istitutus - at acrarau Setzu - est cumentzada sa campagna contra a s'illegalidadi in is iscolas, cun su blocu de is progetus, de is atividadis in prus e cun s'arrefudu de is càtredas passau s'oràriu de cuntratu".