In primu pranu: lota de is pastoris. Pillai (Prc): "S'impitu de scuadras bardadas de gherra est marrania". Gc Tàtari: "Fresu accoau a is pretesas de s'Mps"

(IlMinuto) – Casteddu, 21 de su mes''e ledàminis- "S'impitu de scuadras bardadas de gherra in apógiu de is palatzus de is meris chi ponnit in luxi sa cuscéntzia mala de chini fait promissas e normas sballiadas est, giustamenti, bivia comenti una marrania de chini dimandat scéti de bíviri de su própriu traballu". Cun custus fueddus Vincenzo Pillai, responsàbbili regionali "Problemi del lavoro e dei rapporti con i movimenti sociali" de Rifondazione comunista, espressat solidariedadi a s'Mps a pustis de sa càrriga de martis a merì a fac''e su Consillu regionali.
"Rifondazione comunista – precisat Pillai - pretendit su diritu de is pastoris sardus a s'arreconnoscimentu de is próprius diritus de parti de sa Regioni, de su Stadu e de sa Comunidadi Europea e cundennnat a is sceberus ténnicus e políticus chi funt de meda atesu de is interessus de is allevadoris". A is pastoris est arribbada puru sa solidariedadi de su cordinamentu de is Giòvanus comunistas de Tàtari, Gabriele Ara, chi ponnit perou in discussioni su pensu de su gruppu dirigenti de su Prc sardu asuba de sa chistioni. "Su Prc regionali - scririt Ara - s'est acoau a totus is pretesas de s'Mps, senz''e donai un'arrespusta bera. No est una crítica infecunda cussa chi fadeus a su grupu dirigenti e a su segretàriu Fresu, simplementi credeus ca fadendi aici no si portit unu serbítziu a sa lota insoru e no s'agiudit, comenti s'iat a bolli, a uniri custa lota a is lotas operàjas e de is àterus cumpartus".