Referendum po su nucleari: assembrea de aMpI in Li Punti. "Dógnia sardu s'arrebbellit a custu pranu coloniali"

(IlMinuto) – Casteddu, 18 de su mes''e totussantus - "Promovi su referendum contra a dógnia ipótesi de fabbricai centralis nuclearis e depósitus de ferrinas in Sardigna". Est custu s'obbietivu de su cunvegnu aprontau de a Manca pro s'Indipendentzia in programma cras a merì a is 18.00 in Li Punti (Tàtari), in is aposentus de sa circoscritzioni. "Immoi, tenendu is terras impestadas po mori de is fàbbricas chímicas chi lassant s'Ísula cun d'unu desertu foras de contu, cun is logus de s'internu disabitaus e prenus de disisperaus in circa de traballu - si ligit in d'unu libbureddu informativu curau de s'organizatzioni de sa sinistra indipendentista - bieus meda meda acanta su tentativu de ponni puru una centrali nucleari in Sardigna. No si podit permiti chi sa terra nostra bengat sbuzarrada ancora de prus. Dógnia sardu iat a depi artziai sa própriu boxi contra a custu pranu coloniali, chi si pigat ancora una borta po béstias de maceddu". Ant a fueddai Cristiano Sabino, boxi de aMpI, chi at a acrarai is arrexonis de sa campagna contra a su nucleari e po sa soverania natzionali de su pópulu sardu e Lorenzo Mocci, chi at a ammostai is arrexonis ecologicas e economicas de su no a s'àtomu.