Universidadi. In 500 in corteu asuta de s’àcua po nai no in su Ddl Gelmini, Uds Casteddu: “De sa resisténtzia a sa rebellia. Su 14 totus in pratza”

(IlMinuto) – Casteddu, 30 de su mes''e totussantus - Andat ainnantis senz''e pàsiu sa mobilitada de is Universidadis sardas contra a su Ddl Gelmini, chi oi torrat a s'esàminu de sa Camera. Ariseru a merì, in Casteddu, funti stetius pagu prus de 500 is istudiantis, is istudiosus, is maistus e is precàrius de sa connoscéntzia chi ant nau ancora una borta no a sa riforma de su Guvernu Berlusconi. Is manifestantis ant abetau s'arribbu de is 17.30, oràriu fissau po su cumetzu de su sit in pratza Costituzione, po allomborai de su Bastioni Sant Remy su striscioni cun sa scrita: "Ladri del nostro sapere Assassini del nostro futuro - No al Ddl Gelmini". Est cumentzau aici su corteu-billadroxu. Asutta de s'àcua is participantis, chi portànt àccias, líbburus-símbolu e cartellus billadroxus, funt andaus - passendi de bia Manno e torrendi a artziai in bia Santa Margherita - in su Palatzu de is Sciéntzias, coru de sa protesta portada ainnantis de su movimentu de is istudiantis casteddaius. "De is elementaris a s'Universidadi contra a sa Gelmini blocaus sa citadi" e "Cabai is manus de s'Universidadi púbblica" custus funti scéti calencunu de is corus tzerriaus de is manifestantis. Tra is istudiantis ddoi furiat puru una delegatzioni de is dipendentis de su Teatru líricu de Casteddu, in assembrea fissa de sàbudu passau. Su merì est sighiu cun sa bisioni de "Vieni via con me". In s'última puntada de s'ispetàculu de Fazio e Saviano un'istudiosa de sa Rete 29 aprile at difatis elencau is arrexonis de sa protesta.

Su movimentu de is istudiantis annunciat una mobilitada manna in occasioni de sa dibbata de sa fidúcia a su Guvernu. "Su 14 de su mes''e paschixèdda - si ligit in d'una nota de s'Unioni de is Istudiantis de Casteddu - eus essi in pratza in totu Itàlia, no eus a donai scéti sa discunfiantza a su guvernu, a su contràriu, eus a dimustrai ca nos, inzénneru de precàrius senz''e tempus benidori, no seus discunfiaus. Est arribbau su momentu de passai de sa resisténtzia a sa rebellia".