Istrutzioni. Cobas e Precaràrius de Aristanis: "De s'iscola aziendha de Berlinguer a s'iscola miséria de Gelmini". Cummentus de Sel e Fds

(IlMinuto) – Casteddu, 3 de su paschixèdda - Funt sèmpiri prus numerosas is boxis contràrias a is "riformas" Gelmini de s'iscola e de s'Universidadi. De sa provìtzia de Aristanis arribbant sa nota de imprenta a firma de is Cordinamentu precàrius-Cobas e su comunicau de "Sinistra Ecologia e Libertà". "S'iscola - scrirint su cordinamentu Precàrius e is Cobas - no andat a regimi. Su movimentu de is istudiantis, cun sa sorprendenti sensibilidadi sua asuba de  su beni de totus, ammostat ca s'iscola est in gradu de si formai a sola partendi de terra, in s'arrespetu de sa legalidadi e in su sinnificau arrejonàdu de su tempus benidori. Sa pseuduriforma chi est nàscia de su modellu de Luigi Berlinguer po arribbai a su modellu de s'iscola miséria de Mariastella Gelmini signat unu de is passus prus malus de sa segundha Repúbbrica". Acanta de is istudiantis ddoi est puru sa scuadra política guidada de Nichi Vendola. "Su bentu de protesta chi movit a totu su mundu de s'iscola italiana - precisat Sel Aristanis - arribbat fiamenti fintzas a sa citadi nostra. Est una lota de civiltadi, sa primu fasi de una batalla chi totu sa sociedadi italiana est lamada a guidai po blocai un'àtera poberesa culturali de su sistema de s'iscola". Sa "Federazione della Sinistra" acapiat sa lota de is istudiantis a is àteras reghentis mobilitadas socialis e pedit is dimissionis de Berlusconi e Cappellacci. "A fac''e su sciàsciu chi corpit un'àteru cumpartu de sa giai arruinada sociedadi sarda - scrirint Gianni Fresu (Prc) e Claudio Giorgi (Pdci) – sa Giunta Regionali at cunfirmau dd'essi sa tzeraca de su guvernu natzionali evitendi de pigai in cunsidériu  s' istrumentu de s'Autonomia e specialidadi de su Statutu suu. De is istudiantis a is pastoris, de is maistus a is operàjus in protesta s'artziat un'apellu a su presidenti de su Consillu e a su prestanòmini suu in Sardigna: lassai su pustu debressi".