Língua sarda: su Guvernu ndi liat unu millioni de euru, aMpI: “Un’àteru arrancamentu”

(IlMinuto) – Casteddu, 2 de su mes''e paschixèdda - "Sa cultura sarda esti stetia ancora una borta vìtima de is innumeràbilis arrancamentus fattus de s'Istadu italianu. Sa Sardigna, difatis, at a patiri sa fura de 1.040.071 eurus in  su finanatziamentu de sa lei de tutela de is minoràntzias linguisticas e istoricas".

A denunciai "s'atacu meda grai" est su Diretivu políticu de a Manca pro s’Indipendentzia. "Su critériu de spartzidura de su dinai assignau de sa lei 482 de su 15 de su mes''e paschixèdda de su 1999 - acrarat aMpI - furiat giai stetiu ammenguau in su totali a 5 millionis e mesu de sa lei finantziaria 191/2009. A custu s'aciungit ca cun su Dpcm de su 15.3.2010 sa Sardigna patìt un'àteru impoberimentu de is risorsas chi ant essi spartzias no prus in basi a sa populatzioni, m in basi a sa "radice quadrata" de su númeru de is comunus aundi si fueddant is línguas de minoràntzia. Unu provedimentu befa, custu, e  po mori de custu provedimentu sa cultura de su pópulu sardu benit penalitzada a profetu de cussas comunidadis italianas chi tenint unu númeru mannu de comunus". Sa sinistra indipendentista denunciat "ancora una borta su sfloramentu fatu de su Stadu italianu e de is partidus italianistas chi governant a sa Sardigna". "De custus partidus - concluit su Diretivu - est complici puru su pseudu identitàriu PSd’Az, chi, in sa mudesa prus forti, at permitiu de ndi liai custas risorsas".