Is ànimas cabadas in pratza in Casteddu po nai no a su “modellu Marchionne” furiant milli e prus de milli. Corteus Fiom e Cobas

(IlMinuto) – Casteddu, 28 de su mes''e gennàrgiu - Su tempus malu no at firmau is traballadoris sardus. Custum mangianu funt stetias pagu prus de 3milla is personis chi ant atraversau su centru de Casteddu in su corteu aprontau de sa Fiom po s'isciòpiru generali de is metalmecanicus. Su sindacau narat no a su modellu "Marchionne" e difendit su cuntratu natzionali de traballu "postu a arriscu - si ligit in d'una nota - de proceduras símilis a s'arrecatu". Acanta a is operàjus - cun rapresentantis de sa Rockwool de Igrèsias, de sa Carbosulcis, de s'ex Ila e de sa Keller – ant manifestau puru istudiantis e precàrius. Numerosas is bandheras de sa "Federazione della Sinistra" e de Pcl. In su mantessi tempus e in sa mantessi citadi funt stetias pagu prus de 200 is personis chi ant invecias pigau parti a sa manifestada aprontada de is Cobas, chi po su 28 de su mes''e gennàrgiu iant proclamau s'isciòpiru generali po - acrarat Giancarlo Della Corte – "creai unu ponti de solidariedadi tra is traballadoris metalmecanicus e is àteras categorias". Cun su sindacau de basi ant manifestau delegatzionis de su Sindacadu de sa Natzione sarda, de Sinistra Critica e de su Collettivo marxista leninista de Nùgoro. Tra is manifestantis. marigosori e arrabiu meda po s'arrefudu de sa Fiom sarda de aprontai una mobilitada totus impari. "S'atacu de is meris a is metalmecanicus - at declarau sa boxi de Sns Anghelu Marras – at a tocai a totus is traballadoris. Est importanti duncas donai solidariedadi a sa Fiom e pensaus chi siat assolutamenti foras de contu su fattu chi in Casteddu oi sa Fiom no apat acetau sa solidariedadi de is àterus cumpartus de su traballu". Gianluigi Deiana (Sinistra Critica) e Franceschino Nieddu (Collettivo Marxista-leninista de Nùgoro) dda pensant comenti Marras. "Comenti Sinistra Critica – acrarat Deiana – si seus impignaus po fai una manifestada totus impari puru in Casteddu, biu ca puru sa Cgil iat proclamau un'isciòpiru generali. Ma sa Fiom sarda est stetia grai de origas a s'pellu nostru". "A dolu mannu - precisat Nieddu is concas mannas sindacalis no ant bófiu s'unidadi tra is traballadoris e oi in Casteddu s'agataus a faci 'e un'iscena pagu bella: sa classi operàja spartzia de is àterus cumpartus produtivus".