"Marea niedda": nascit su Cumitau po sa difesa de su Golfu de S'Asinàra. Cappellacci: "Is responsàbbilis ant a pagai (si ddoi funt)"

(IlMinuto) – Casteddu, 28 de su mes''e gennàrgiu - Sighit sa mobilitada de citadinus e grupus de su logu contra a sa "marea niedda". Cras a merì in Pòrtu Turre (Saba Filippo Canu, 18.30) s'at a costituiri difatis su Cumitau po sa difesa de su Golfu de S'Asinàra. "Funt imbidaus a participai - si ligit in d'una nota pubblicada in su social network Facebook – totus is citadinus de sa Sardigna de Tramuntana e totus is grupus de su territóriu nàscius a pustis de su sciàsciu ambientali de sa marea niedda. Is citadinus ant a podi fueddai cun relatus chi ammostint is chistionis chi in custas diris interessànt a su golfu de S'Asinàra. Is relatus depint essi de 5 minutus màssimu". In su trastempus puru sa Regioni Sardigna at precisau su pensu suu asuba de su sciàsciu ambientali de s'11 de su mes''e gennàrgiu. Ariseru, in Terranòa, su presidenti de sa Giunta regionali, Ugo Cappellacci, at declarau a Videolina: " Primu eus a avalorai cun precisioni is términus de sa chistioni, duncas si ddoi funt dannus e si ddoi funt responsàbbilis custus ant a depi pagai comenti est naturali chi siat".