Anfiteatru romanu de Casteddu. Su Gig circat volonteris po "isciarrocai su linnàrg

(IlMinuto) – Casteddu, 22 de su mes''e fiàrgiu - Un'ispesa de 800milla eurus po ndi liai sa crobetàntzia de linna de s'Anfiteatru romanu de Casteddu? Su "Gruppo di intervento Giuridico" - chi de annus meda pedit s'abbatimentu de custu "linnàrgiu scandalosu" - bolit fai arresparmiai dinai pretziosu a is busciacas de su Cumunu. Comenti? "Po abbàtiri is costus de sa manorberia - si ligit in su giassu de s'assótziu ambientalista - eus a essi volonteris po ndi ghetai a gratis su linnàrgiu chi de annus meda strupiat su monumentu romanu prus importanti de sa Sardigna, e dd'eus a fai asuta de sa diretzioni de sa Soprintendenza archeológica. Cumbidaus a totus a fai acitotu, ant essi 10 oras e pagu prus de traballu po donniunu". In diris passadas s'assessori comunali a is Traballus púbblicus, Raffaele Lorrai, iat annunciau s'aprontamentu de unu progetu de 800milla eurus po su scordonamentu de s'istrutura de linna. Cifra chi immoi iat a podi essi ammenguada de meda gratzias a campagna de su Gig. "Mandaisì is adesionis cun su nominativu e is recàpitus - acrarant is aprontadoris de su Gig - a s'indiritzu email grigsardegna5@gmail.com [...]. Eus a scriri nos s'elencu de is colonteris a sa Soprintendenza archeológica e a su Comunu de Casteddu".