Aremus in Portovesme. S'Arpas cunfirmat: "Funt radioativus", aMpI: "In su 2005 su referendum est stetiu boicotau de is partidus italianus"

(IlMinuto) - Casteddu, 4 de su mes''e fiàrgiu - "De s'Itàlia scéti is aremus". Aici su Diretivu natzionali de a Manca pro s’Indipendentzia cummentat s'isbarcu in Portovesme – de su 29 de su mes''e gennàrgiu - de tres autocarrus càrrigus de aremus chi beniant de Brescia: 70 tonnelladas de arrefudus radioativus blocaus primu de intrai in manixu. Sa cunfirma de sa radioatividadi de is materialis lompius de sa penísula est arribbada ariseru candu funt stetias concluidas is anàlisi chímicu-físicas fattas de s'Arpas. "In su 2005 - ammentat aMpI - is indipendentistas ant promòviu unu referendum po proibiri s'importatzioni de arrefudus e aremus industrialis chi impestant, ma custu referendum est falliu po mori de sa boicotadura de is partidus e de is sindacaus italianus chi ant dimustrau ancora una borta cun chini funt. Sa sinistra indipendentista sarda s'arringherat contra a is pràtigas criminalis chi s'Itàlia de tempus meda mandat ainnantis n Sardigna, sperdendi is cumpartus económicus traditzionalis e cumandendi unu modellu de isvilupu chi fait scéti disimpreu e destrossas a s'ambienti".