“Funt fadendi strossa de manifestantis”. De Su Cairu su contu de una picioca sarda

(IlMinuto) - Casteddu, 4 de su mes''e fiàrgiu - "In pratza Tahrir funt fadendi strossa de manifestantis, Mubarak po dd'acotzai at pagau a sa genti pobera (féminas, óminis e pipius). 500 francus a is cairotus e 200 a chini arribbat de is campus". Cumentzat aici su messagiu mandau ariseru in su giassu www.Affrica.org de una picioca sarda chi bivit de tempus meda ingunis. Su messagiu tenit s'obbietivu de arribbai a s'imprenta. "Chini est massacrendi a sa genti in pratza - precisat sa fémina - po su beru no funt is manifestanti chi funt cun su guvernu (comenti scririt Repubblica), ma funt is politziotus in borghesu e is mercenàrius chi faint imbolai molotov e pedras. Nos de innoi intendeus is isparus. Is ferius funt prus de milli, ma no scéti ddoi funt mortus medas puru e in pratza ddoi funt ancora famílias". "Lompi fintzas a innoi est stetiu - si ligit in d'unu segundhu messagiu mandau de s'aereoportu - unu dillíriu. Seus stetius frimmaus e atacaus in diversus postus de blocu popolari, oramai est cassa a su giornalista strangeri. [...] un'acumapngiamentu militari s'at scortau fintzas a unu puntu prus tranchílliu. Eus provau a pigai contatu cun s'ambasciada, chi serrada in su palatzu suu, no si nd'acatat de cussu chi ddoi est a foras de ingunis".