Iscórias in Portovesme. Cumitau "Carlofortini Preoccupati": "Su cuntrollu depit essi fattu deis entis púbblicus"

(IlMinuto) – Casteddu, 21 de su mes''e fiàrgiu - "Po mandai ainnantis s'interessu de s'ambienti e de sa genti e no de seguru po agiudai a is interessus de is industrialis, s'únicu sistema de cuntrollu profetusu est cussu gestiu de is entis púbblicus e no de is mantessis sociedadis privadas". Cun custus fueddus su Cumitau "Carlofortini Preoccupati" arremaciat a is fueddus de s'assessori Provintziali de s'Ambienti, Carla Cicciloni, Pd chi - po su Cumitau - "Si cumpraxit cun sa Portovesme srl e iat a bolli allargai su sistema de cuntrollu (privau, ndr), chi no est po nudda trasparenti, a àteras aziendhas". Is "Carlofortini Preoccupati" arrespundint puru a is afracadas de Cgil, Cisl e Uil contra a chini "in custas cidas at fattu de totu po otèniri prus trasparéntzia". "Un'afracada diaici - narat su Cumitau - depit nasci forsis de sa dimandha fatta de is diversus cumitaus e assótzius, po otèniri prus cuntrollus e cumpudadas agoa de s'acontéssia de is duus autocarrus prenus de Cesio 137 chi beniant de sa fàbbrica "Alfa Acciai" de Brescia funt stetius frimmaus pagu primu de stuai su matériali de sa morti aintru de sa Portovesme srl".