"Ni una mas!". In Ciudad Juárez sighit su maceddu de is féminas: 306 vìtimas in su 2010. Cras in Casteddu un'eventu po ammentai a sa cosa

(IlMinuto) – Casteddu, 18 de su mes''e fiàrgiu - Funt giai 900 e prus - 306 scéti in su 2010 - is féminas bocias de su 1993 in Ciudad Juárez, in Messicu, sémpiri cun su mantessi rituali: ratu, tortura, trumentu sessuali, istrúpius mannus e strossadura. A is maceddus avreguaus s'aciungint àteras 1000 féminas sparessias. Sa chistioni at essi denunciada cras in Casteddu (Teatru "La Vetreia", 18.00) cun su progetu "Ni una mas! Non una di più!", fattu po donai boxi e agiudu a  "Nuestras Hijas de Regreso a Casa", un'assótziu chi ponit impari a is familiaris de is féminas bocias e sparessias in Ciudad Juárez. Su programma de su merì previdit sa proietzioni de su documentàriu "Juárez, la città dove le donne sono usa e getta" e sa presentada de su líbburu "Ciudad Juárez, la violenza sulle donne in America Latina, l’impunità, la resistenza delle Madri". In sa citadi messicana - acrarant is aprontadoris - "su clima de violéntzia sighit a cresci senz''e chi siant stetias promovias atzionis fortis po ponni fini e po fai luxi asuba de custus fattus malus. Su maceddu de is féminas est [...] su fillu de su crímini internatzionali aprontau beni beni e chi bit trisinadas a is autoridadis de su guvernu".