“Tocat a dd’acabbai cun s’ocupatzioni militari de sa Sardigna”, aMpI narat no a su “Pranu seguresa” de Maroni

(IlMinuto) - Casteddu, 3 de su mes''e fiàrgiu - Sa sinistra indipendentista bullat a su "Pranu seguresa po sa Sardigna". Cun d-una nota de su Diretivu natzionali a Manca pro s’Indipendentzia narat no a is mesuras propostas ariseru in Aristanis - in d-un'atóbiu cun is síndhigus e cun su presidenti de sa Regioni - de su Mininistru de is Internus, su leghista Roberto Maroni. "In is biddas nostras - precisat aMpI - serrant is serbítzius sustantzialis, is istradas funt in cunditzionis piedodas, su traballu est a s'arruina e is colonialistas pensant de resòlviri custu fastídiu sociali cun d-una preséntzia de fortzas de ocupatzioni militari italiana prus manna. Invecis de torrai a fai bivi sa pastoria, sa massaria, s'indústria "leggera" e de ofèrriri serbítzius giustus a is comunidadis nostras, s'Itàlia progetat de spendi dinai in casermas e filuferru spinosu própriu comenti faint is israelianus in Palestina". In sa diri de ariseru Maroni at atobiau puru a un'ambasceria de su "Movimento Pastori Sardi", in Aristanis po dimandhai ispiegatzionis asuba de s'acasàgiu chi ant tentu su 28 de su mes''e paschixèdda in Civitavecchia. "Acotzaus puru a custa cosa fatta de Mps - cummentat aMpI - poita a is pastoris e a totus is sardus bengant reconotus is própriu diritus políticus democraticus e su diritu de bivi de su própriu traballu cun dignidadi".