Bint'annus de sa nàscida de su Prc: in Casteddu assembrea cun Oggionni, Fresu e Zedda

(IlMinuto) – Casteddu, 4 de su mes''e martzu - "Beneus de atesu, andaus atesu". Funt cun custus fueddus de Palmiro Togliatti a donai su títulu a s'assembrea púbblica aprontada de su Círculu Gramsci de su Prc po custumerì a is 18.00 in Casteddu. "In 1991 - si ligit in d-una nota de imprenta - nasciat su partidu de sa "Rifondazione Comunista". A pustis de bint'annus seus cumbintus chi siat necessàriu fai unu bilànciu de s'istoria nostra e ddu depeus fai castiendi a is isfidas chi s'abetant in su tempus benidori, isfidas comenti partidu e comenti Federatzioni de sa Sinistra". A s'atóbiu ant a participai su cordinadori natzionali de is "Giovani Comunisti", Simone Oggionni, su segretàriu regionali de su Prc, Gianni Fresu, e su candidau a síndhigu Massimo Zedda. "S'Itàlia e sa Sardigna oi, comenti bint'annus fait - concluit sa nota - tenint bisóngiu de unu partidu e de una sinistra unia capassi de traballai po sa difesa de sa dignidadi e de is diritus".