Eletzionis in Casteddu. Zuncheddu: “Su polu indipendentista? Un’atu de amori po sa natzioni sarda”. Sni: “Sì a s’alleàntzia”

(IlMinuto) – Casteddu, 4 de su mes''e martzu - "Su polu indipendentista at essi un'atu de amori po sa natzioni sarda. S'inghitzu de unu caminu de traballu tra is fortzas indipendentistas a pustis de tantis divisionis". Cun custus  fueddus sa consillera regionali Claudia Zuncheddu narat de eja a sa proposta fatta mérculis passau de su leader de Irs Gavino Sale: presentai a is eletzionis comunalis de Casteddu unu terzu polu indipendentista cun Zuncheddu etotu candidada a síndhigu de sa "primu citadi sarda". S'arrespusta positiva de sa Zuncheddu a sa proposta de Sale - at acrarau sa consillera indipendentista a IlMinuto - est perou conditzionau su permissu de parti de "totus is fortzas indipendentistas". "Teneus comenti obbietivu - narat sa consillera - a annientai su centrudestra, e de ataciai unu centrusinistra chi fatuvatu presentat is mantessi arretzetas de is antagonistas, cun sa costrutzioni de un'alleàntzia de totus is fortzas indipendendentistas e cun su trisinamentu de is movimentus ambientalistas". Cali est su progetu po su tempus benidori de sa citadi? "Tocat a fai de Casteddu - precisat Zuncheddu - sa primu citadi de sa natzioni nostra. Una citadi chi siat rapresentativa e speciali, chi afrontit is programmas a cumentzai de is bisóngius de is citadinus". A sa proposta de su terzu polu fatta de Irs est arribbau puru s'acotzu de Sardigna Natzione Indipendentzia. "Cumetzaus de Casteddu cun Claudia Zuncheddu – scririt su cordinadori natzionali Bustianu Cumpostu – e passaus fiamenti de su 'fai impari' a si 'ponni impari'. Fiamenti puru Irs si declarat pronta a afrontai is eletzionis amministrativas de Casteddu cun d-unu sceberu in prus, unu sceberu chi siat diversu de cussu italianista, unu sceberu guidau de Claudia Zuncheddu".