"Scrieus impari una Carta de is diritus de sa natzioni sarda": sa proposta de aMpI a is fortzas indipendentistas

(IlMinuto) – Casteddu, 17 de su mes''e martzu - Acabbai "su clima de aciocu inútili e incomprensìbili chi ddoi est tra is fortzas indipendentistas, un'aciocu fundau scéti asuba de chistionis ideòlogicas e astratas". Cun custu obbietivu a Manca pro s’Indipendentzia fait un'apellu a totus is partidus indipendentistas po "aprobiai in d-unu Carta de is diritus de sa natzioni sarda de scriri e de cundividi impari comenti patrimoniu comunu de su pópulu sardu". Sa proposta est stetia presentada custu mangianu in d-una cuferéntzia de imprenta in sa sedi tataresa de bia Cetti. S'apellu de aMpI at essi mandau a is diretzionis natzionalis de Sardigna Natzione, Irs, Progres, Paris, Indipendentzia e a sa "parti indipendentista" de is Rossomori. "Difatis creeus - acrarat su Diretivu políticu natzionali de aMpI - chi a fac''e sa crisi de costitutzioni de s'autonomismu e a su fallimentu de is partidus italianus in Sardigna, in custu mamentu istoricu, s'indipendentismu, si depat pigai sa responsabbilidadi de inditai unu caminu minimu de cundivisioni, unu caminu orientau a sa difesa de sa sociedadi e sa civiltadi sarda, unu caminu po fai torrai a froriri a sa Sardigna".