"Sindrome de Quirra". Zuncheddu: "De Cossiga un'àteru ingànniu"

(IlMinuto) – Casteddu, 14 de su mes''e martzu - Sighit s'abbétia tra Claudia Zuncheddu, consilleri regionali indipendentista, e Giusepppe Cossiga, sutasegretàriu a sa Difesa. "Fustei - scririt Zuncheddu in d-una lítera oberta mandada a su rapresentanti de su Guvernu Berlusconi - si pigat ancora tempus po perificai si siat berus o falsu chi is sperimentatzionis in is poligonus, comenti in Quirra, siant cumpatìbilis cun sa saludi de sa genti e de is militaris chi traballant in custus logus". "Po fustei - dimandhat sa consillera indipendentista a su políticu tataresu - 20 annus de dinúntzias de deformidadis agatadas a is pipius nostrus (po no fueddai de cussas de is angionis e de is procededdus chi bivint acanta de sa basi) e de linfomas tra militaris e personali civili de is poligonus funt diaderus causadas de is manielis chi s'agatant in su DNA de is sardus?. "Su pigai tempus de fustei, comenti cussu de s'assessori Liori, po fai àterus e pagu crarus acertamentus epidemiologicus - concluit Zuncheddu - est un'àteru ingànniu a sa faci 'e sa destrossa sanitària e ambientali chi ndi liat is ogus a unu tzurpu".