“Su pópulu sardu no est in gherra cun nemus”: su no de aMpI a trisinai a s’Ísula in d-una gherra contra a sa Libia

(IlMinuto) – Casteddu, 21 de su mes''e martzu - "Su stadu coloniali italianu no tenit nisciunu diritu de tragai in gherra a su pópulu sardu, in nisciunu casu e po nisciunu motivu". In su mentris in sa pista de sa basi de Deximu Mannu is aéreus de gherra spagnolus e cussus de is Emiraus arabus funt prontus po tucai abbia de sa Libia, sa manca indipendentista de aMpI narat de no a fac''e sa boluntadi de trisinai a sa Sardigna in sa gherra. "Su determinu Onu n° 1973 – scririt su diretivu natzionali de a Manca - decretat s'intrada in gherra de su Stadu Italianu contra a sa Libia. Is bombardamentus funt cumetzaus oi (sàbudu, ndr) a is 17.45 e is aéreus impitaus in is operatzionis funt partendi de sa basi de Deximu Mannu, in Sardigna (in dógnia modu sa basi sarda est stetia cuncedia po s'operatzioni, ndr)". "Funt seti - precisat aMpI - is basis aéreas chi s'Itàlia est cuncedendi a is fortzas de sa Nato, tra custas ddoi est cussa Deximu Mannu". "Su pópulu sardu - concluit su Diretivu - no est in gherra cun nemus, no at declarau gherra a nemus i est foras de contu chi sa seguresa de is sardus siat a arriscu po mori de is acocadas fattas de sa política éstera de su stadu chi ocupat a oi su territóriu natzionali nostru".