Apretu traballu. Cgil, Cisl e Uil: "Sa Giunta regionali at traixu a s'acórdiu de su 4 de su mes'e làmpadas"

(IlMinuto) – Casteddu, 21 de su mes'e arbili - "Un'atóbiu tirau meda, cun diversas chistionis in sa mesa e pagus solutzionis". Est custu su cummentu de is segretàrius generalis de Cgil, Cisl e Uil a sa bessida, ariseru de su cunfruntu cun su presidenti de sa Regioni. S'atóbiu s'est tentu a sa fin'e su corteu - cun sa participatzioni de pagu prus de 3milla personis - de su palatzu de su Consillu regionali in bia Roma fintzas a s'arburada Trento: una protesta contr'a sa preitza de sa Giunta regionali a fac'e s'apretu industriali. Própriu ariseru is sindacaus - "impudosus" po s'ésitu de s'atóbiu - ant cunfirmau sa mannifestada populari previdia po su mes'e làmpadas. "In s'atóbiu is segretàrius generalis, Costa, Medde e Ticca – si ligit difatis in d-una nota de imprenta - ant arremaciau ca nemmancu unu puntu de s'acórdiu de su 4 de su mes'e làmpadas est stetiu aplicau e is mesas istitutzionalis promitias duus mesis fait de Cappellacci etotu non ant donau arresurtaus cuncretus".