Contienda Eurallumina: a sa Rusal 18 mesis po fai torrai a partiri is impiantus

(IlMinuto) - Casteddu, 15 de su mes''e arbili - Sa Rusal tenit 18 mesis po torrai a fai partiri is impiantus Eurallumina in Sardigna. Est cantu si ligit in su documentu de su Ministeru de s'Isvilupu económicu fattu connosci ariseru a sa fini de una reunioni cun sa participatzioni de su Ministru Paolo Romani, de su presidenti de sa Regioni, Ugo Cappellacci, de s'assessori de s'Industria, Oscar Cherchi, de is rapresentantis de is Entis de su logu e de is organizatzionis sindacalis. Po spingi a sa multinatzionali russa a torrai a pigai sa produtzioni in Sardigna iat a depi bastai s'impignu de su Guvernu a assegurai sa furnidura de s'ollu combustìbili necessàriu a fai torrai a incamminai a s'impiantu - primu de passai a su nodriamentu a craboni - a unu prétziu "cumpatìbili cun cussu inditau de s'aziendha".A pustis de cidas e cidas de mobilitadas asuta de is pórcius de su palatzu de su Consillu regionali, in Casteddu, sa lota de is 300 traballadoris de Eurallumina otenit is primus arresurtaus. Ariseru is operàjus ant manifestau in Roma, primu de is ésitus de s'atóbiu. S'acontéssia Eurallumina at a sighiri a essi in s'agenda de su Ministeru de s'Isvilupu económicu puru in is cidas chi benint: po su 28 de su mes''e arbili est in programma una reunioni in sa sedi de su Ministeru po donai "atzioni cuncreta" a s'"operatzioni po dda torrai a ponni in motu".