Furesteris: in Casteddu is 700 citadinus tunisinus abetant su permissu de tratenimentu. Osservatóriu scontróriu. “Torraideddis sa libertadi debressi

(IlMinuto) – Casteddu, 8 de su mes''e arbili - Su Guvernu at firmau su decretu chi at a permiti a is furesteris tunisinus de arriciri su permissu de tratenimentu temporaneu. In su mentris chi abetant su documentu is 700 citadinus tunisinus sighit a essi inserraus in s'ex depósitu de s'Aereonautica in s'arburada Elmas, in Casteddu. Ariseru unu númeru mannu de tunisinus ant tentu sa solidariedadi de genti meda 'e su logu, difatis ddis ant portau cos''e papai e ddis ant arregalau puru unus cantu càrrigas po is telefonus cellularis. Una corantina de citadinus de sa Tunisia ant brincau is cungiaduras de s'istrutura militari po passillai pagu pagu in su bixinau de Santu Tènneru po torrai a pustis in s'ex depósitu. Asuba de sa chistioni fueddat puru, cun d-una nota de imprenta, s'Osservatóriu po s'amparu de is libertadis e contr'a is scontrórius. "S'Osservatóriu - si ligit in d-una nota - difendit a su diritu de asilu de is disterraus e cundennat a sa política ratzista de is guvernus europeus. Funt is guvernus europeus chi no ponint in motu su diritu de asilu, funt is guvernus europeus is únicus responsàbbilis de sa morti de is 250 is disterraus naufragaus in Lampedusa". "Sa Sardigna - precisat s'Osservatóriu - est una terra de acasàgiu e solidariedadi, duncas pensaus ca is 700 disterraus aghillius de sa Sardigna depant essi liberaus debressi de sa caserma de s'Arburada Elmas, ingiriada de militaris e filuferru spinosu".