"Su Comunu de Casteddu pagat sa campagna de Fantola?". Zedda denunciat una a "coincidentzia strana"

(IlMinuto) – Casteddu, 6 de su mes''e arbili – Sa revista de su Comunu de Casteddu asuba de s'arregorta differentziada de s'àliga, "Separa news", pinnicada impari cun su fógliu eletorali de su candidau a síndhigu de su centrudestra belusconianu Massimo Fantola (Riformatori). Est cantu ant agatau in sa cascita de sa posta is citadinus casteddaius de su tretu de San Benedetto. A denunciai sa "coincidentzia strana" est su candidau a síndhigu de su centrusinistra, Massimo Zedda, rapresentanti de "Sinistra Ecologia e Libertà". "S'assessori a is Serbítzius Tecnologicus, cumpetenti puru po s'àliga - acrarat Zedda - est Gianni Giagoni, eligiu cun is Riformatori, partidu chi est cordinau de Massimo Fantola, candidau de su centrudestra in sa gara po s'eletzioni a síndhigu".

"Aundi est sa coincidentzia?", dimandhat Zedda. "In s'ai postu - precisat su rapresentanti de Sel - impari a sa pubblicatzioni asuba de sa differentziada chi tenit su macru de Comunu su paperi eletorali de su candidau Fantola. Chini pagat  a sa campagna eletorali de su centrudestra? Est su candidau de su centrudetra chi pagat sa distributzioni po su Comunu o a su contràriu, su Comunu de Casteddu cun su dinai de is casteddaius, est parti ativa in sa campagna eletorali de su candidau de su centrudestra? Su primu casu iat essi grai, su segundhu iat a essi unu crìmini mannu".