"Capo Pecora": in 40 incasillant a is traballus po su fàbbricu de su radar

(IlMinuto) – Casteddu, 11 de su mes'e maju - Si fait prus forti sa lota contr'a su fàbbricu de su radar nou in "Capo Pecora", in su territóriu de Frùmini Mayori. Gràtzias a una sceda passada de personi in personi in Facebook ("SOS funt arribbendi is ruspas in Frùmini Mayori po cumentzai a fabbricai su radar. A su presídiu ddoi est pagu genti, tenit abbisóngiu de agiudu. Gheta sa boxi"), ariseru a mangianu pagu prus de caranta citadinus e unus cantu militantis de su Cumitau No Radar ant ocupau su tretu aundi si bolit ponni su radar. Custu ordingiu de "Capo Pecora" fait parti de una retza chi iat a depi essi fatta in sa costera occidentali de sa Sardigna, trisinendi puru Tresnuraghes e Santu Antiogu. Calencuna diri fait su síndhigu etotu de su Comunu Santu Antiogu, Mario Corongiu, at annutziau recursu a su Tar contr'a su fàbbricu de su radar militari de sa Guardia de Finantza.