Cumitaus no radar: “Agoa de sa reunioni prefetus-síndhigus. Afortiaus is presídius”. Manifestada in s’Argentiera

(IlMinuto) - Casteddu, 26 de su mes'e maju - Est manna sa delusioni de is Cumitaus no radar po s'ésitu de s'atóbiu de ariseru tra prefetus e síndhigus, atóbiu chi s'est tentu in is ufícius de bia Torino in Casteddu. "S'ésitu de cust'atóbiu - si ligit in d-una nota de imprenta fatta connosci de is Cumitaus - est stetiu pagu bellu meda: no est stetiu decidiu nudda e nemmancu is traballus funt stetius frimmaus. Is Presídius nostrus abarrant bius e antzis s'afortiant. Arremaciaus sa totali arrialia nostra a su fàbbricu de custa retza de radar militaris, po su prus cara meda, inútili e noxili po is personis e po s'ambienti. Boleus chi su cumprimentu suu siat annullau e no chi siant stresiaus in àterus logus". Sa reunioni in is ufícius de sa Pretura furiat stetia acumpangiada de unu sit in de protesta aprontau de is Cumitaus no radar, cun sa participatzioni de pagu prus de 70 personis. Contr'a su fàbbricu de is istruturas - e cun prus atentzioni a su radar de s'Argentiera in su territóriu de Tàtari - s'est espressau puru Giovanni Fara de Sni. "Sardigna Natzione Indipendentzia – scririt Fara - donat sa màssima solidariedadi a is citadinus de su burgu de s'Argentiera chi de dexi diris e prus funt ocupendi su tretu lamau "La Vedetta". Seus contràrius meda e dd'eus ammostau cun sa lota contr'a su nucleari, a fàbbricus nous de custu tipu i a is tzerachias chi s'Itàlia bolit fai in sa terra nostra". Custu merì in s'Argentiera, de is 17.00 a is 24.00, ddoi at essi una manifestada "cun arti música e scedas in su presídiu no radar. Unu merì de participatzioni e arresesténtzia civili".