Eletzionis comunalis: bitória manna de Zedda in Casteddu. Igrèsias eligit a Perseu. In Sìnnia bincit Pusceddu

(IlMinuto) – Casteddu, 31 de su mes'e maju - Casteddu a sa manca de centru, Igrèsias a sa dereta de centru e Sìnnia a s'alleàntzia Pd-"moderaus". Funt custus is arrasutaus de su segundhu turnu de is eletzionis comunalis in Sardigna. In sa "capitali" de s'Ísula Massimo Zedda (59,4%) bincit a Massimo Fantola (40,6%) frimmendi is 17 de fil'e  de s'alleàntzia berlusconiana. In sa bitória casteddaia ddoi est perou ancora su dúbbiu asuba de su númeru de is segius chi depint pigai s'unu e s'àteru. Ariseru su Ministeru de s'Internu donat sa majoria in Consillu comunali a sa dereta de centru, ma - precisat sa nota ministeriali - "is datus si faint a is comunicatzionis arribbadas a is comunus e no funt po tanti uficialis. Sa proclamatzioni uficiali de is eligius est incàrrigu de is ufícius eletoralis de su territóriu". Igrèsias invecis premiat a sa dereta de centru: a su segundhu turnu Ginetto Perseu - acotzau de Udc-Psd’Az e Pdl - pigat su 52,5 po centu de is votus contr'a su 47,5 de Marta Testa, rapresentanti de Sel acotzada de sa manca de centru. Strambecu s'arrasutau de Sìnnia. In su ballotagiu Barbara Pusceddu (55,8%) - acotzada de Riformatori, Psd’Az, Fli, Pd e Udc - at bintu a Paolo Zedda (44,2%), candidau de Partecipazione democratica, Fds, Idv, Sel e Rossomori.