Eletzionis comunalis in Casteddu. Unius e Diversus: "No a sa casta de sa dereta de centru e de sa manca de centru". Frigau (Sni): "Nono a is arringheramentus italianistas"

(IlMinuto) – Casteddu, 27 de su mes'e maju - A pagus oras de su ballotagiu tra Massimo Zedda e Massimo Fantola po s'eletzioni a síndhigu de Casteddu si fait sèmpiri prus callenti su dibbàtidu tra is fortzas chi ndd'ant fattu parti - o ant acotzau - a sa candidadura de Claudia Zuncheddu. A s'afirmadura de ariseru de Antonello Giuntini, de sa lista cívica "Cun Claudia Zuncheddu" ("nos inidipendentistas, mai cun sa dereta") funt sighias is dichiaras in faori de s'astensioni de "Uniti e Diversi" e de Francesca Frigau (Sni). "'Uniti e Diversi Sardegna' - si ligit in d-una nota - est po s'astensioni a segundhu turnu de is eletzionis amministrativas de Casteddu. Cun custu pensu boleus arremaciai sa luntanànscia nostra de sa cuncetzioni de sa política de is arringheramentus de sa casta, conscius chi sa dereta de centru e sa manca de centru siant complicis de sa colonizatzioni de sa Sardigna". Ateretantu sicus is fueddus de Frigau. "Est, po mei. dirigenti de Sni, foras de contu - precisat sa rapresentanti indipendentista - pensai de acotzai a unu o a s'àteru arringheramentu, no ddoi est nisciuna difaréntzia tot'e is duus faint parti de unu modu de fai política italianista [...], is arresurtaus de custu modu funt sa primu causa de totus is miseresas chi contribbulant a sa Sardigna".