Eletzionis comunalis in Casteddu. Zedda: "Eus a tenni sa majoria in Consillu". Pcl e aMpI cumbidant a s'astensioni

(IlMinuto) – Casteddu, 23 de su mes'e maju - Niscuna "anadi tzopa", chi fessat de binci a su ballotagiu su centru sinistra casteddaiu at a tenni su 60 po centu de is ségius in Consillu comunali. Est cantu precisat cun d-una nota Massimo Zedda, rapresentanti de Sel e candidau a síndhigu de s'alleàntzia de centrusinistra. "Sa majoria in Consillu comunali - scririt Zedda in d-una nota - at essi garentia a chini at a binci a su ballotagiu. Nos eus giai pigau su bóbidu, spintus de is casteddaius chi ant giai sceberau sa frischétzia e sa sa novidadi de su programma nostru". Ma no totus cussus de sa manca acotzant a Zedda: su Pcl e aMpI cumbidant cun craresa a s'astensioni in su segundhu turnu. "Aintru de totu su gíriu italianista - scririt su diretivu natzionali de a Manca - no ddoi est nisciunu rennou, ma ddoi funt scéti màscaras po meris arrexinaus. Cumbidaus a totus is simpatitzantis, is iscritus, is sustenidoris de sa manca indipendentista sarda de no andai a votai a su ballotagiu, ddis naraus de s'astenni a donai su votu a calisisiat partidu italianu o a is partidus "sardistas" amigus de su blocu italianu". Puru sa setzioni de Casteddu de su Pcl cumbidat a no acotzai a su ballotagiu niscinu candidau. Po su Pcl "Zedda est un'àtera illusioni chi unu guvernu de liberalis potzat resòlviri is arrefrigadas e is schilévrius fillus de sa sociedadi capitalistica".