"Liai sa dèlega a Equitalia", sa proposta de is indipendentistas a is síndhigus sardus

(IlMinuto) – Casteddu, 10 de su mes' maju - In is cidas chi benit is síndhigus de totus is comunus de sa Sardigna ant arriciri una lítera cun su cumbidu a ndi liai a Equitalia sa dèlega po sa coberantza de is pagamentas. S'annutziu est fattu ariseru de Gavino Sale (Irs) in sa cuferéntzia de imprenta fatta in Casteddu cun sa participatzioni de Claudia Zuncheddu (Indipendentistas), Giuseppe Carboni (Irs) e Francesco Guccini. Gióbia chi benit Guccini, consilleri comunali in Nùgoro, at a presentai in s'àula consiliari "sa dimandha de annullamentu de su cumbéniu de sa citadi prus importanti de sa Barbàgia cun Equitalia po sa coberantza de is pagamentas de su logu". S'arrumpellamentu contr'a Equitalia - acusada de ponni in genugu milli e prus milli impresas sardas "po mori de unu sistema de coberantza ingiustu iniquu" - s'iat a podi spaniai debressi comunu po comunu. Sa primu amministratzioni a ndi liai sa dèlega a Equitalia iat a podi essi cussa de Pèifugas, aundi su síndhigu Mario Satta est pensendi de afidai su serbítziu de coberantza a sa ragioneria comunali.