Militarizatzioni: 1131 firmas contr'a su radar. Oi sit in in Casteddu

(IlMinuto) - Casteddu, 25 de su mes'e maju - Crescit puru in su web sa protesta a su fàbbricu de su radar in sa costera Ocidentali de sa Sardigna. Funt difatis 1131 is personis chi ant giai firmau sa petitzioni on line po de mandai a su ministru de s'Ambienti, a su presidenti de sa Giunta regionali i a is síndhigus de is Comunus interessaus. Custus radar - si ligit in su documentu - "ant permiti de intercetai a is barcas de is furesteris a diversus km de is costeras candu s'agatant ancora in àcuas internatzionalis, aundi est permitiu de respingiri a mari custa genti, operatzionis chi faint milla e prus de milla mortus. In dógnia modu custa retza eletromagnetica s'aprontat a cotzai a is gherras noas de su colonialismu chi s'ocidenti tenit in progetu de sighiri a fai in s'Africa de tramuntana e rapresentat un'àtera militarizatzioni de unu territóriu giai ocupau e arruinau de is tzerachias militaris". Custu mangianu in Casteddu (11.30, bia Torinu) est in programma unu sit in de is Cumitaus No Radar a fac'e is ufícius de sa Procura, po sa "reunioni tra prefetus i entis de su logu trisinaus in su fàbbricu de is radar".