Costus de sa política. Zuncheddu e Ben Amara: "No a sa morti de sa democràtzia. Ammenguai is privilégius de is consilleris"

(IlMinuto) – Casteddu, 7 de su mes'e argiolas - "Sa proposta chi bit de acórdiu casi totus is políticus in Consillu Regionali de ammenguai su númeru de is rapresentantis de 80 a 60, po ammenguai is costus de sa política [...], est una proposta demagògica i est un'àteru bículu de democratzia liada". Est cantu narant cun d-una nota de imprenta is consilleris regionalis Claudia Zuncheddu (indipendentistas) e Radouan Ben Amara (comunistas). Zuncheddu e Ben Amara narant de nono a s'impiticamentu de su númeru de is consilleris - chi iat a determinai sa bogadura de s'àula de bia Roma de is partidus prus piticus - ma pedint de ammenguai is costus e is privilégius. "Cunformementi cun sa proposta de lei depositada tempus fait in Consillu - scrint Zuncheddu e Ben Amara – arremaciaus s'abisóngiu de abbàtiri totus is privilégius de sa màchina políticu-amministrativa, a cumentzai de su costu de dónnia consilleri e cun s'obertura de is 'palatzus de su cumamdu' a sa màssima participatzioni populari". Su progetu presentau de Zuncheddu proponit de ndi liai su 50 po centu de su dinai arriciu de is consilleris i àteras atzionis chi iant a portai a su rispàrmiu de pagu prus 7 millionis de eurus a s'annu. Su 3 po centu de totu sa finantziària de su 2010.