Zuncheddu contra a Equitalia. Sa rapresentanti indipendentista: "Sa Giunta aplichit s'artículu 51 de su Statutu"

(IlMinuto) – Casteddu, 19 de su mesi de ledàminis - Su fiscu italianu i Equitalia faint dannus mannus a sa messarítzia, a sa pastoria, a s'artesanau, a su Cumérciu e a totus is fainas de su territóriu e a is partidas Iva in Sardìnnia. Est candu denuntziat cun d-un'interrogatzioni a sa Giunta regionali - de su 12 de su mesi de ledàminis - Claudia Zuncheddu, consilleri de is Indipendentistas. Po Zuncheddu su guvernu regionali tenit crupas mannas in custa acontessia: no aplicat difatis s'artículu 51 de su Statutu. In Sardìnnia - acrarat Zuncheddu - Equitalia si "bantat de ai superau is obietivus de coberantza prevìdius, ma at provocau una poberesa económica manna a is impresas e a is famílias" cun "dannus po sa saludi de is pagadoris"."Milli e prus de milli impresas sardas - narat - sighint a essi sutapostas a afrincas e scicutas no scéti de is aziendas […] ma sa primu domu puru, contravenendu a sa Carta Sotziali Europea". Est una chistioni aici grai chi est apretosu pediri - pretzisat sa rapresentanti de is Indipendentistas in s'interrogatzioni contra a Equitalia - s'apricu de s'artículu 51 de su Statutu. Aprichendi custu artículu sa Giunta regionali iat a podi dimandai a su Guvenrnu de frimai is provedimentus de su stadu chi faint dannu a s'ecunumia de s'Ísula.