"Sardegna Uno": crescint a 4 is líteras de lissentziamentu a is giornalista. Zuncheddu (Indipendentistas): "Una lei regionali po s'editoria"

(IlMinuto) – Casteddu 12 de su mesi de gennàrgiu - Funt cuàturu is líteras de lissentziamentu arribadas a is giornalistas de "Sardegna Uno". A cussas de is diris passadas mandas a Piersandro Pillonca, Gianni Zanata e Andrea Sanjust s'est aciunta ariseru sa racumandada arribada a Giuseppe Giuliani. De is lissentziamentus de is cuàturu giornalistas bófius - ma po imoi frimaus - de s'editori e presidenti de sa Banca de Créditu sardu Giorgio Mazzella, s'at a chistionai custu meigama in d-un'atóbiu intre s'azienda e su sindacau in sa domu casteddaia de "Sardegna Uno". Apitzus de sa chistioni fueddat cun d-una nota Claudia Zuncheddu, consilleri regionali de is Indipendentistas. "Sa crisi chi allupat is aziendas de su cumpartu de s'editoria - scririt Zuncheddu - no podit essi resòlvia lissentziendi a is giornalista chi non funt arringheraus cun s'editori. Est lompia s'ora chi sa Regioni pongat manu a su cumpartu de s'informatzioni cun d-una lei chi assegurit sa variedadi de s'informatzioni po totus is sardus, liendi su dinai públicu a is determinus de su 'políticus de turnu'".