Tres mesis de su ratu de Rossella Urru. “Vespa giru” in totu sa Sardigna po no si ndi scaresci de sa coperanti

(IlMinuto) – Casteddu, 23 de su mesi de gennàrgiu - Funt passadas giai 90 diris de su ratu de Rossella Urru in su campu disterraus po saharawi a Tindouf, in Algeria. A tres mesis giustus giustus de su secuestru de sa coperanti sarda chi fait parti de su Comitau internatzionali po s'Isvilupu de is pópulus, is Vespa Club de sa Sardigna ant aprontau in diversus tzentrus, unu caminu in vespa cun is àcias. In Casteddu su "Vespa giru" po no si ndi scaresci de Rossella Urru at a cumentzai a is 18.00 in pratza República po acabai a is 20.00 in pratza Jenne, cun d-un'atóbiu cun su Comitau Rossella Urru. "Una filla nostra - si ligit in su comunicau de su Vespa Club Casteddu - movia in Africa a fai beni, s'agatat disamparada, presonera de unu grupu de bandius de su desertu giai de tres mesis. Est netzessàriu amentai a totus is sardus ca depeus artziai sa boxi e sa tiradura asuba de s'acuntéssia de custa sorri nostra, tocat fai passai a is autoridadis cumpetentis sa dimanda nostra poita si fatzat totu su possíbili po fai torrai a Rossella a domu cantu primu"