Universidadi. Zuncheddu (Indipendentistas): "Tassas online foras de contu po is istudiantis sardus"

(IlMinuto) – Casteddu, 24 de su mesi de fiàrgiu - S'istrobu fatu a is istudiantis de su pagamentu online de is tassas universitàrias lompit in Consillu Regionali. Est de su 20 de su mesi de fiàrgiu passau difatis, s'interrogatzioni cun dimanda de arraspusta iscrita, de su Consilleri regionali Indipendentistas Claudia Zuncheddu. S'Universidadi de is Istudius de Casteddu, difatis, po su pagamentu online de is tassas universitàrias, giai caras, sceberandi su Bancu de Sardigna comenti istitutu de coberàntza diventat "complici" de sa sbussadura de su 2 po centu in prus de sa cifra de pagai, su motivu est sa comissioni bacària. Una comissioni cara meda si castiaus a is 2 eurus spendius po is pagamentusa fatus in su portellitu o po cussu fatus a mesu bancomat.In d-unu mamentu de crisi económica grai po sa Sardigna "Is istudiantis sardus - narat Zuncheddu - giai trumentaus de s'aumentu de is costus de is trasportus, de is afitus, de is líburus" e acacigaus de "provedimentus chi ponint is cadenas sèmpiri de prus a su diritu a s'istudiu e a sa frecuéntzia universitària", depint pagai puru una comissioni asuba de is pagamentus online, una comissioni "foras de tempus e foras de contu".