Convergéntzia Indipendentista: ProgRes, Sni e aMpI presentat su Paperi su pópulu sardu

(IlMinuto) – Casteddu, 12 de su mesi de martzu - Est de un'annu fait, po sa pretzisioni de su 17 de su mesi de martzu de su 2011, sa proposta de Convergéntzia Natzionali fata de a Manca pro s'Indipendentzia a totus is organizatzionis indipendentistas. Una data sceberada. Su 17 de su mesi de martzu de su 2011 furiat difatis sa diri in sa cali s'Itàlia afestàt su cumprimentu de is annus suus: 150 annus de Tricolori. Unu cumprimentu de is annus, su "de'Itàlia unia" chi no est stétiu indendiu de totus comenti una festa. "Is cunditzionis económicas, culturalis, sotzialis e ambientalis de sa Sardigna funt malas meda. Custa situatzioni no derivat de una cumbinatzioni ma est filla de sa gestioni política i económica italiana de s'ísula nostra. No ddoi est sceberu de s'Itàlia e de sa política de s'autonomia chi no apat tentu un'efetu malu meda asuba de sa terra nostra in is úrtimus 150 annus. Inghitzat diaici su documentu chi aMpI at discuti agoa, impari a is àteras organizatzionis indipendentistas, su 27 de su mesi de arbili de su 2011 in Tièsi, in su contestu de sa festa natzionali de is Sardus, "Sa die de sa patria sarda". Su 17 de su mesi de martzu de su 2012, a un'annu giustu de sa proposta fata de sa manca indipendentista, in is aposentus de s'Hotel Mediterràneu, in s'arburada Diaz in Casteddu, a is 10.30, is organizatzionis políticas de Progetu Repùblica de Sardigna, Sardigna Natzione Indipendentzia e a Manca pro s’Indipendentzia ant a presentai e ant a sotoscriri totus impari in d-una cuferéntzia de imprenta, su Paperi de Convergéntzia Indipendentista. Is movimentus indipendentistas - pretzisat una nota de imprenta - "Tant acabau su traballu de stérrida de su Paperi de Convergéntzia Indipendentista cumintzau s'annu passau e portau ainnantis cun grandu passioni tzivili e cun d -un'anàlisi e unu dibàtidu mannus" e cumbidant duncas a sa cuferéntzia de imprenta a "chinisisiat bollat pigai parti e cundividi custu mamentu de acrescimentu e de rennovu de importu mannu de su movimentu de liberamentu natzionali ". In is traballus at essi presentau puru su progetu de unu campu de adesioni política de totu s'indipendentismu, chi at essi obertu a is organizatzionis, a is movimentus, a is assótziu e a is tzitadinus scapus chi gherrant in difesa de sa soverania de su pópulu sardu.