aMpI presentat "Sa die sa Patria sarda". Una festa intre música, dibàtidus e cunvergéntzia

(IlMinuto) – Casteddu, 24 de su mesi de arbili – Su 27 e su 28 de su mesi de arbili chi benit sa manca indipendentista sarda at a afestai in Tièsi Sa die de sa patria sarda in s'amentu de is revolutzionàrius "caius po liberai a s'ísula nostra de sa tirania piemontesa", comenti at pretzisau Alessandra Ruggiu, membru de sa Diretzioni Natzionali de s'organizatzioni a Manca pro s'Indipendentzia, in sa cuferéntzia de imprenta chi s'est tenta oi in sa domu tataresa de arruga Cetti 2. Su programa est arricu meda. Si andat de un'azènda prena de atóbius e dibàtidus a s'isfilada de is Boes de Otzàna, ma no est acabada inoi, s'at a sboddiai puru unu prantzu populari cumbidau de aMpI e po is concertus de su merì chi ant a biri asuba de su palcu cantautoris e bandas sardas de importu mannu, intre custus "I Primo Chef del Cosmo", Alberto Sanna e su grupu Ska de Thiniscòle nomenau meda Ruja Karrera. Prusaprestu, comenti pretzisau in sa cuferéntzia de imprenta, is duas diris ant essi s'ocasioni po torrai a promòviri su caminu de sa Cunvergéntzia Indipendentista promoviu de a Manca pro s'Indipendentzia própriu un'annu fait aintru de is afestus de Sa Die de sa Sardigna. In sa bidda símbolu de is motus repubricanus e indipendentistas de sa fini de su Setixentus, su 28 de su mesi de arbili chi benit at essi difatis prevìdiu unu dibàtidu obertu a totus cussus chi tenint gana de "si cunfrontai apitzus de is temas de su Pareri de Cunvergéntzia Natzionali". Scéti pnerrendi a "totus is organizatzionis, is assótziu, is comitaus, is movimentus sotzialis e de categoria, is intelletualis e is tzitadinus scapus chi si connoscint in is valoris e in is aficus de su Paperi" - at pretzisau sa dirigenti de sa manca indipendentista - s'at a podi pentzai a inaugurai unu cursu nou po un'indipendentismu prus cumpriu, prus coerenti e frimai sa balcanizatzioni de s'única fortza sotziali e tzivili de sceberu a s'interinada definitiva de s'ísula"