In Aristanis 20 telecàmeras po cumbàtiri su fenómenu de is indillinchiteddus e de sa malafatia. Su no de is Comunistas Giòvanus

(IlMinuto) – Casteddu, 12 de su mesi de arbili - Is Comunistas Giòvanus - Partidu de su Prc Federatzioni de Aristanis, narant ca no a s'impiantu de videucàstiu in sa tzitadi. Sa bidea de s'istrutura no est noa, difatis est passada atressu de is progetus de diversas giuntas, agatendi cumprimentu in s'aministratzioni de su presenti ghiada de su Comissàriu Ghiani. "Su Comunu de Aristanis bolit afrontai is chistionis sèmpiri prus incolliosas acapiadas a sa seguresa urbana, dotendi sa Polizia de su logu de unu sistema de videucàstiu". Sa gara de apaltu previdit, in prus de s'installatzioni de is 20 telecàmeras, su cumprimentu de su Tzentru de Cuntrollu de videucàstiu in sa domu de sa Polizia Municipali, innoia ant essi cullegadas is telecàmeras atressu de una retza in cirroni óticu. S'apaltu oviamenti benit finantziau cun su dinai de s'aministratzioni comunali. "Is indillinchiteddus aristanesus tanti tímius - si ligit in d-una nota de imprenta de is Comunista Giòvanus - no ant a dromiri prus sonnus tranchillus, is numerosas bandas chi faint tanti a timi a s'Aristanis perigulosa meda tenint pagu tempus e ant a depi andai in àterus logus a fai mabi". "Nos - sighit su comunicau de imprenta - teneus un'àtera manera de intendiri sa seguresa chi de seguru no passat atressu de is telecàmeras e de su scontróriu [...] Custu determini 'de seguresa' - comenti acontessit fatuvatu - cuntrollat su cabu scéti de sa chistioni ma no pigat in cunsidériu s'arrexini sua. "Is 'indillinchiteddus' - si pretzisat in sa nota - chi tanti faint a timi funt giòvanus e piciocheddus de sa mantessi Aristanis no funt de seguru furesteris lompius no si scit de innua", funt piciocus lassaus a foras de sa vida sotziali, culturali e política. Is indillinchiteddus funt a cantu narant is giòvanus de su Prc "s'arrasutau de annus e annus de imbarbarimentu políticu carateritzau de faoris e clientelas".