Galsi. Diana bullat sa proposta de Lai: "Àteru ca referendum. Bosàterus no eis nimancu interessau sa genti trisinada"

(IlMinuto) – Casteddu, 4 de su mesi de arbili – "Su Pd sardu, chentza de connosci su progetu Galsi, ddu difendit i est favoràbili a su cumprimentu suu. Custu nointames a is populatzionis interessadas, de su totu disinformadas de sa graesa de unu progetu, chi bendiu comenti àtera 'oportunidadi', s'amostat imbecis un'àteru afàriu malu a is dannus nostrus e de sa Terra nostra. Po straviai totu custu no serbint referendum. Est bastanti aplicai sa lei e impitai su sabiori". Cun custus fueddus Sergio Diana, de su Comitau "ProSardegnaNoGasdotto", arraspundit a sa nota firmada de Silvio Lai, publicada unus cantu de diris fait in d-unu cotidianu sardu. In sa lítera oberta su segretàriu de su Pd proponit de introdùsiri una "legislatzioni noa po pigai parti a is scéberus mannus (comenti sa Tav e su Galsi, ndr) e po s'espressai in matéria de trasparéntzia in is istitutzionis e in sa sotziedadi, acotzendi dógnia forma de determinu populari, de is primarias a is referendum". "Prusatotu po cantu minescit is 'òperas mannas' - arremaciat Diana - iat a bastai […] aplicai beni sa normativa natzionali, europea e internatzionali presenti, in manera particulari in matéria de óbrigus de scedas, comunicatzioni e trisinamentu de sa genti de su logu".