Online sa petitzioni pública promòvia de aMpI po fai su tzentru de sa soberania económica in sceberu a sa militarizatzioni

(IlMinuto) – Casteddu, 18 de su mesi de arbili - Sa soberania passat po s'ecunumia puru: custa s'idea filla de sa proposta de a Manca pro s’Indipendentzia chi torrat a promovi sa lota contra a sa Caserma benienti de sa Brigata Tàtari in Nùgoro tuchendi de su territóriu e de is prodotus suus. Sa proposta est cussa de fabricai in is terras cívicas de Pradu su "Tzentru de sa Soberania Económica", impitendi is 24millionis de euru finatzius po fabricai sa caserma "a manera chi si potzat donai unu traballu dignitosu a is giòvanus de Nùgoro imbecis de ddis donai aposéntus e càtiris po trupas militaris". Torrai, duncas, a sa comunidadi nugoresa is terras suas po agiudai sa produtzioni de su logu, de is resossas agriculas, artesanalis e de s'allevamentu, fintzas a cussas culturalis chi ant fatu de Nùgoro unu de is bratzolus de s'arti sarda. Una proposta "po no tzèderi a faci de s'invasioni de is Tzentrus cumetzialis italu-europeus a cumentzai de su fàbricu de un'industria de sa "filiera" sarda, chi acotzit un' ecunumia indipendenti chi arrispetit s'ambienti e is resossas suas". Po acotzai sa proposta est stétia promòvia un'arregorta de firmas puru po sa petitzioni de indiritzai a su Comunu e sa Provìntzia.