"Paris fait una política dirigia a friai su traballu mandau ainnantis de is indipendentistas de annus e annus". aMpI fridat is raportus cun s'organizatzioni de Meloni

(IlMinuto) – Casteddu, 13 de su mesi de arbili - Est truncadura intre a Manca pro s'Indipendentza e Paris, s'organizatzioni ghiada de Salvatore Meloni promotora de s'arregorta de is firmas chi at a depi donai a su pópulu sardu sa possibilidadi de s'espressai asuba de s'indipendentzia de s'ísula. Paris, chi primu de su disamparu de sa mesa de traballu furiat impignada in sa Convergéntzia Indipendentista, est stétia, difatis, intre is organizatzionis chi ant donau vida a su Paperi presentau in Casteddu su 24 de su mesi de martzu passau. Unu documentu chi tenit comenti obietivu printzipali su de portai "sa Sardigna a foras de sa dipendéntzia económica e política de s'Itàlia". Arrugas diversas, cussas fatas de sa manca indipendentista, chi defint su fai políticu de Paris Malu Entu una "faina faciuda e provocatoria" e cussa pigada de Meloni. "Salvatore Meloni [...] - pretzisat aMpI - at fueddau atressu de s'imprenta in acotzu de Umberto Bossi augurendusì una torrada sua a sa ghia de su partidu italianu Lega Nord, cun craresa ratzista e autoritàriu [...] chi in is úrtimus annus at guvernau s'Itàlia impari a àterus partidus italianus e chi est duncas de su totu responsàbili impari a is àterus de is ulterioris protzessus de penetratzioni coloniali in sa terra nostra". Ma no est acabada innoi, poita a Manca marcat e criticat puru s'apógiu de Meloni a Sel e a sa candidada a síndigu Katia Marcias po is aministrativas benientis de su comunu de Terraba. "Amentaus ca Sel est un fortza abertamenti contrària a sa cusa indipendentista e no a fueddus ma cun is fatus", de su mamentu ca - pretzisat sa nota de imprenta fata connosci de sa manca indipendentista - "su partidu alleau nou de Meloni at espressau, atressu de su segretàriu regionali suu Attili, sa boluntadi de fabricai una caserma noa de sa Brigata Sassari in Utieri, comenti sceberu a su progetu de Nùgoro". Imprefinis, "Pigau atu ca Malu Entu […] no at amollau o truncau is abitatzionis suas cun is partidus italianus a Manca pro s'Indipendentzia fridat in forma ufitziali dógnia raportu cun custu sugetu políticu e cumbidat a totu su movimentu indipendentista a si ndi stresiai de issu po salvai sa perra sana, organitzada e aprontadora de su movimentu de liberamentu sardu".