Tessiu. In Sardigna ddoi est una gioventudi ativa chi promovit formas de governance noas in matéria de políticas giovanilis.

(IlMinuto) – Casteddu, 17 de su mesi de arbili - s'est tentu in Crabas su fine de cida passau su meeting Tessiu, un'atopu de is Consultas Giovanilis de sa Sardigna. Ant pigau parti a is traballus 250 giòvanus e prus. De s'atóbiu est nàsciu su Paperi de is Consultas Giovanilis de sa Sardigna i est stétiu firmau unu Protocollu de Intesa, allargau a sa Regioni. Sa de is consultas est una realidadi chi est amanniendi sèmpiri de prus aintru de su mundu de is assótzius de is giòvanus sardus. In Sardigna, difatis, funt 75 is aministratzionis comunalis e duus is aministratzionis provintzialis chi ant istituiu una consulta giovanili in su própriu territóriu cun s'obietivu de aglianai is inzénnerus nous a pigai parti a sa vida cívica e a is protzessus de determinu. A firmai su Paperi e su Protocollu de Intesa funt stétias is Consultas de Àrbus, Assèmini, Baulàu, Crabas, Fiolìnas, Gonnosfanadiga, Mandas, Marrùbiu, Neoneli, Norghìddo, Ossi, Pramas, Paùlle, Arriòra, Sedilo, Serramanna, Siamajori, Sabarussa, Uri, Villamar e Tzorfolìu. Su Protocollo de Intesa, allargau a su Presidenti e a s'Assessori cun delega a is Políticas Giovanilis de sa Regioni Autònoma de Sardigna, a is aministradoris cun delega a is Políticas Giovanilis de is otu Provìntzias sardas e a is Síndigus de totus is comunidadis de s'ísula, tenit s'obietivu - si ligit in d-una nota de imprenta - "de insitzuligai s'istitutzioni de Consultas Giovanilis in totus is comunus de sa Sardigna e reconòsciri is mantessis comenti istrumentu de importu mannu po sa promotzioni de is giòvanus e su cufrontu democràticu intre is giòvanus e is istitutzionis". Intre is iscopus, cussu de favorèssiri s'aprou de una lei regionali in matéria de políticas giovanilis cun s'istitutzioni - pretzisat su comunicau - "de resossas ispecificas po donai concretesa a is fainas cordinadas e integradas in faori de sa gioventudi sarda".