Protzessu a Nino Fancello po su bliz in su poligonu de Teulada. "S'atzioni de Sni, teniat un'obietivu pretzisu, torrai a afirmai sa soberania única de is sardus

(IlMinuto) – Casteddu, 10 de su mesi de maju - Martis 15 de su mesi de maju, a is 9.00, in is aposentus de su Tribunali de Casteddu s'at a oberri su protzessu a Nino Fancello, militanti de s'orgazitzioni indipendentista Sni. Fancello ant a andai a protzessu po ai pigau parti, su 25 de su mesi de ledàminis de su 2005, a unu bliz in su Poligonu de Teulada a sa sa boxi "Invasores a foras!" S'operatzioni fut aprontada de unu cumandu de Sardigna Natzione Indipedentzia chi iat ocupau su poligonu militari. Lompius atressu de mari asuba de tres gomonis is militantis de Sni proclamànt sa soberania única de is sardus in su territóriu ponendi sa bandera natzionali sarda e sa de su movimentu insoru. Sa lota de is piscadoris e su grupu de protesta no iant permitiu su sboddicamentu trancuillu de is esercitatzionis, e sa Nato etotu fut obrigada a lassai su poligonu de tiru primu du su chi pentzàt. "S'atzioni de Sni - pretzisat su cordinadori Natzionali de s'organizatzioni indipendentista Bustianu Cumpostu - teniat un'obietivu pretzisu, torrai a afirmai sa soberania única de is sardus in su territóriu natzionali e donai unu sinzu craru de arrempellada a s'asugetamentu". Po sa diri de su pretzessu, Sardigna Natzione Indipendentzia at a aprontai unu sit in in solidariedadi a su militanti suu a faci de su Tribunali de pratza Repúbrica e cumbidat a totu su pópulu sardu a pigai parti a sa cosa.