Ballotagius Sardigna. Fds: "satisfatzioni prena po sa bitória de Tendas e Lubrano"

(IlMinuto) – Casteddu, 27 de su mesi de làmpadas - "Po sa dereta de tzentru sarda est sonada s'ora de su requiem, s'amostat difatis, si balu no fessat abastàntzia craru, unu progetu políticu perdidori e chi est andendu in disacatu". Est cantu narat sa Federatzioni de sa manca a pustis de is ballotagius de domínigu passau, chi ant biu comenti protagonistas is tzitadis de S'Alighera e de Aristanis. Sa bitória est de sa manca de tzentru, is síndigus nous ant essi difatis Tendas in Aristanis e Lubrano in S'Alighera. Custa sa lézida unitaria de su segretàriu de su Prc Alessandro Serra e de cussu de su Pdci Alessandro Corona: "su messagiu chi custa sciorta aministrativa si donat est totu po sa manca de tzentru. Is tzitadinus - pretzisant is duus segretàrius in d-una nota de imprenta - ant premiau sa solutzioni diversa, in is métidus e in is programas chi sa manca de tzentru est arrenescia a fai in is tzitadis de Aristanis e de s'Alighera. A su contràriu in àteras realidadis, aundi si funt acotzaus is acórdius impiastru, si perdit, comenti amostant is eletzionis de Ceraxus".